इस्रायलने एक वर्षानंतर घराबाहेर पडताना मास्क अनिवार्य करण्याचा नियम रद्द केला आहे. इस्रायलमध्ये जवळपास ८० टक्के लोकसंख्येचे लसीकरण झाले आहे. त्यानंतर आता इस्रायलने रविवारी मास्क वापराचा अनिवार्य वापर करण्याचा निर्णय मागे घेतला आहे.
लसीकरणानंतर करोनाबाधितांचे रुग्णालयातील प्रमाण कमी झाले. त्याशिवाय करोनाबळींची संख्याही कमी झाली. इस्रायलमध्ये फायजरच्या लशीने लसीकरण करण्यात आले. इस्रायलमध्ये १६ वर्षांवरील व्यक्तिंना लस देण्यात येत आहे. त्याशिवाय १६ वर्षाखालील अल्पवयीनांना लस देण्यासाठीची चाचपणी सुरू आहे.
इस्रायलमध्ये लसीकरण मोठ्या प्रमाणावर करण्यात आले होते. त्याच्या परिणामी संसर्गबाधितांची संख्या कमी झाली. त्यामुळे काही नियमांमध्ये शिथिलता देणे शक्य झाले असल्याचे इस्रायलचे आरोग्यमंत्री युली इडेलस्टेन यांनी म्हटले.
९३ लाख लोकसंख्या असलेल्या इस्रायलमध्ये आतापर्यंत ५० लाख लोकांना करोनाची लस देण्यात आली आहे. इस्रायलमध्ये कार्यालयात मास्कचा वापर अनिवार्य केला आहे.
करोना लसीकरणानंतर इस्रायलमधील परिस्थिती बदलली आहे. जानेवारी महिन्याच्या मध्यापर्यंत इस्रायलमध्ये दररोज सरासरी दहा हजारबाधित आढळत होते. आज हेच प्रमाण सरासरी २०० प्रति दिवस इतके कमी झाले आहे. इस्रायलने संसर्गाला अटकाव करण्यासाठी लागू केलेल्या निर्बंधांमध्येही शिथिलता आणली आहे. त्यानंतरही करोनाची लागण होण्याचा दर घटला आहे.
