बरखास्तीच्या निर्णयानंतर पुनरुज्जीवन झालेल्या नासुप्रला आता आर्थिक बळ मिळाले आहे. नियोजन प्राधिकरण म्हणून नव्याने अधिकार मिळाल्याने विकास योजनांवरील खर्चातही वाढ करण्यात आली आहे. गेल्यावर्षीपेक्षा सव्वातीनशे कोटी रुपयांनी यंदाच्या अर्थसंकल्पात वाढ करण्यात आली. ९२७.७५ कोटींच्या अर्थसंकल्पात घरकुल प्रकल्प आणि खेळांच्या मैदानावर मोठ्या प्रमाणात खर्चाची तरतूद आहे. गुंठेवारी योजनेच्या माध्यमातून नासुप्रला ३५ कोटी रुपयांचे उत्पन्न मिळणार आहे.
३० मार्च रोजी झालेल्या नासुप्रच्या वार्षिक अर्थसंकल्पीय बैठकीत सभापती मनोजकुमार सूर्यवंशी, नासुप्र विश्वस्त व आमदार विकास ठाकरे, विश्वस्त व नगररचना विभागाच्या सहसंचालक सुप्रिया थूल, विश्वस्त संदीप ईटकेलवार, महाव्यवस्थापक निशिकांत सुके, अधीक्षक अभियंता लीना उपाध्ये, कार्यकारी अधिकारी अनिल राठोड, मुख्य लेखा व वित्त अधिकारी विलीन खडसे आदी उपस्थित होते. या सभेत विश्वस्त मंडळाने विविध विषयांना मान्यता प्रदान केली.
एकाच शहरात दोन विकासक संस्था नकोत, अशी भूमिका घेत तत्कालीन सरकारने नासुप्रस बरखास्त करण्याचा निर्णय घेत नागपूर महापालिकेला सर्वाधिकार दिले होते. मात्र, सत्ताबदल होताच नवे पालकमंत्री नितीन राऊत यांनी या निर्णयाला विरोध करत नासुप्रला नियोजन प्राधिकरण म्हणून पुन्हा अधिकार प्राप्त करून दिले. अधिकार गेल्यामुळे नासुप्रच्या अर्थसंकल्पात मोठी घट झाली होती. २०२०-२१चा अर्थसंकल्प केवळ ३०८ कोटींचा होता. २०२१-२२ मध्ये ६०२ कोटींचा अर्थसंकल्प मांडण्यात आला होता. मात्र, करोनामुळे यातील केवळ २६३ कोटी रुपयेच खर्च होऊ शकले.
असा होणार खर्च
घरकुल योजना : १५० कोटी
अभिन्यासात मूलभूत सुविधा : ६५ कोटी
खेळाचे मैदान : १० कोटी
जनसुविधा केंद्र : ३ कोटी
विकास कामे (डांबरीकरण) : १०५ कोटी
दलित वस्ती सुधार योजना व इतर : ४१२ कोटी
आशीर्वाद नगर, कळमना बाजार : ५ कोटी
एसटीपी (सिव्हेज ट्रिटमेंट प्लान्ट) : १५ कोटी
इतर विकास कामे : १०० कोटी
गुंठेवारी अंतर्गत विकास कामे : ५० कोटी
मेट्रोला ठेंगा
केंद्र शासन, राज्य शासन, नासुप्र आणि मनपा यांच्या संयुक्त प्रकल्प असलेल्या मेट्रोसाठी प्रत्येकी पाच टक्के हिस्सा असलेल्या नासुप्र आणि मनपाकडून अद्याप ५५० कोटी रुपये येणे बाकी आहे. नासुप्रकडून अद्याप १८९ कोटी रुपये महामेट्रोला प्राप्त व्हायचे आहेत. ते मिळाले तर कॉटन मार्केट, इंदोरा, कडबी चौक येथील स्टेशनच्या कामाला गती येईल, असे महामेट्रोकडून सांगण्यात येत आहे. मात्र, नासुप्रने अर्थसंकल्पात मेट्रोसाठी काहीच तरतूद केली नाही.
